NIN O CREMOS!

WOW! Sabedes que? Que botamos as contas do que había na caixa de cambio e no peto de doazóns e... Sabedes canto recadamos?

Veña bah, botádelle!

Canto? Un pouco máis...

Un pouco máis...

Un pouso máis...

...

 

 

Pois si! Nada máis e nada menos que 785,29 € e todas estas doazóns!!!

 

 

O tempo botouse enriba e as voluntarias da Asociación Protectora de Animais Valadouro-Alfoz non puideron vir a recoller o diñeiro recadado e as doazóns de penso e comida húmida antes de que acabara o cole, pero sabedes o mellor? Que nos volveron a convidar a ir á protectora en canto acaben as obras a pintar o noso logotipo nunha das súas paredes e a coñecer a asociación! 

Non nos digades que non é un bo agasallo! Estamos desexando que a nosa mestra concerte día para ir!

TAPÓNS E MÁIS TAPÓNS

Ao longo do curso clasificamos infinidade de tapóns por cores e tamaños... co obxectivo de crear con eles o cartel que presidiría a illa de reciclaxe e algúns adornos para o horto que iamos crear coa axuda das familias.

Conseguimos clasificar os tapóns suficientes (ou eso cremos), pero por mor da falta de tempo non conseguimos levar dita actividade a cabo así qeu deixámolos apartados a un lado para retomar dita tarefa o curso que vén!

E CHEGOU O GRAN DÍA!

E case sen tempo a pensalo, chegou o gran día!

Quedamos ás 9 da mañá na praza do Centro Cívico para colocar e organizar todo o que deixaramos o día antes colocado en caixas, pero estabamos tan desexosos que a maioría de nós chegou case á par da nosa mestra Marta, que foi un anaco antes para colocar as mesas.

En menos do que canta un galo tiñamos todo preparado:

Foi unha mañá intensa, con momentos de moito traballo e momentos de non tanto, e o certo é que tiñamos tantas manualidades que, a pesar de que vendemos unha gran chea de cousas, aínda nos quedaban bastantes, así que antes de levar o posto para a escola fomos ao edificio do concello chamar porta por potra e vender algunha cousiña máis.

E despois recollemos todo rapidamente e fomos para escola, montamos de novo o posto coas cousiñas que quedaban e paramos uns minutiños a picar algo de comer, que estabamos esfameados! Mirade se tiñamos fame, que en canto nos puxeron a comida na mesa quedamos todos calados! 

Non todo vai ser traballar, ou? 

Mais despois de comer continuamos coa venda ata as 16:30 horas! E vendemos case todo! Pero estabamos tan cansos que por votación unánime decidimos deixar as contas da caixa para  o próximo día de clase, é dicir, o luns, porque mañá ímonos de excursión!

XA TEMOS CASE TODO LISTO!

Ao longo dos dous últimos trimestres traballamos arreo facendo manualidades con algúns materiais mercados e outros de refugallo ou de reciclaxe:

- Decoramos floreiros con papel de seda.

- Creamos lapiseiros pintando con esmalte de unllas con tarros de cristal e decorando latas con teas que nos doaron.

- Construímos macetas coa mesma técnica que empregamos para crear os lapiseiros.

- Elaboramos libretas con portadas decoradas por todas e todos nós.

- Pintamos pedras de diferentes tamaños a modo de calcapapeis.

- Deseñamos marcapáxinas con plástico máxico. Si! Si! Un plástico no que debuxas e, unha vez rematado o deseño, metes ao forno e reduce ata 7 veces o seu tamaño! 

- Reciclamos ceras vellas no no forno para crear outras con forma de peza de crebacabezas, peza de lego ou pegada de mascota.

 

 

E DEIXAMOS TODO LISTO E ORGANIZADO PARA O DÍA DO MERCADO!