Ao longo desta semana as Ecopatrullas tiveron un intenso traballo durante o tempo de recreo explicando e axudando ao alumnado de Primaria do centro a separar os residuos producidos coas merendas para despois podelos reciclar.
Aquí vos presentamos aos verdadeiros protagonistas deste movemento!
 |
| Alejandro, Adrián e Carla |
 |
| Inés, Ángel e Jesús |
 |
| Candela, Noa e Yoel |
 |
| Noelia, Dani e Carlota |
 |
| Mohamed, Julia e Elsa (reincorporarase nos próximos días) |
Aínda que o mal tempo e as numerosas alertas por vento desta última semana nos complicaron un pouco as cousas, despois duns cantos imprevistos e uns cantos cambios de última hora... por fin comezou o traballo das EcoPatrullas nos recreos!
No recreo do mércores fixemos unha breve reunión para recordar todo o aprendido sobre a reciclaxe con Cristina, resolver dúbidas acerca de que residuos dos que abundan nas merendas de media mañá se depositan en cada contedor e preparar os colectores do lixo con bolsas para facilitar o posterior tratamento dos residuos recollidos.
Tal e como vedes na foto, só temos os máis comúns: o verde (residuos orgánicos), o amarelo (envases lixeiros) e o azul (papel e cartón). E diredes vós, entón o de cor negra? Pois o de cor negra é onde depositaremos todo aquilo que poida ir para o composteiro, que aínda non está instalado porque estamos de obras no horto da escola, a que non o sabiades? Pois si! Estámolo remodelando integramente! E estanos dando moito, moito, moito traballo, e tamén vamos con moito, moito, moito retraso. Máis ben estamos aínda empezando porque a choiva impediu que traballaramos máis da metades dos días...
Pero agora imos ao máis importante. Que credes que é o que sucede na recollida de lixo durante os recreos? Que tipo de residuos predominan? Hai diferenza entre uns e outros ou está a cousa igualada? Ao longo desta semana seguiremos recollendo datos fotográficos e revelarémosvos os resultados!
O pasado venres recibimos a visita de Cristina, unha monitora de Sogama que nos deu unha charla sobre as 3R: Reducir, reutilizar e reciclar.
Falounos das 3R e deunos trucos para reducir e reutilizar, aínda que fixo especial fincapé na reciclaxe porque é a temática na que se centra o Plan Proxecta Recíclate con Sogama no que participamos este curso 2020/2021.
Descubrimos unha morea de cousas que non sabiamos e aclaramos ideas sobre os distintos contedores do lixo e os residuos que debemos depositar en cada un deles, pois tiñamos bastantes dúbidas e decatámonos que ata o momento cometiamos algún que outro erro.
Estivemos moi atentos e tomamos notas para recordarnos de todo. Pero..e vós, tédelo claro? Gustaríavos que vos expliquemos todo o que aprendemos?
O pasado mes de decembro un transportista tróuxonos ao cole os 3 contedores (o amarelo, o verde e o azul) para comezar o programa de reciclaxe no centro e o composteiro para instalar no horto da escola e facer compost a partir de todos os residuos orgánicos de orixe vexetal que se xeran no comedor e dos restos de poda das zonas verdes da escola!
